تمارين لازم تعملها قبل ما تعمل هايكنج على الجبل
الهايكنج هواية ممتعة جدا وطريق الوصول للقمة يستحق المغامرة، بس الهايكنج من غير رياضة هيكرهك في الهواية، وده راجع للمجهود البدنى الضخم اللى بتبذله أثناء صعودك على الجبل، واللي بيحتاج تكون على قدر عالي من اللياقة البدنية والقدرة على التحمل.
عشان كده احنا هنقولكم على جدول تمارين تعملوها قبل الرحلة بشهر عشان تكونوا مستعدين بدنيا للجبل.
ال squat:
تمرينة الاسكواد من التمارين القوية اللى بتشغل كذا عضلة فى الرجل زى العضلة الأمامية والخلفية.
وطريقة التمرين الصحيحة ليها انك تقف، وتفتح رجلك بحيث تكون فى خط مستقيم مع الكتف، وتنزل وانت ضهرك مفرود اكنك هتقعد على كرسى وحاول تنزل على اد ما تقدر، وأحرص على إن ضهرك يكون دايما مفرود ورجلك ثابتة على الأرض.
ال push ups:
تمرينة ال push up أو ما يعرف فى مصر بالضغط من التمارين اللى بتشتغل على عضلات متنوعة فى الجسم زى الصدر والبطن والظهر.
عشان تعمله صح بتحط ايدك على الأرض، ويكونوا فى خط مستقيم مع كتفك، وبعد كده بتفرد رجلك للوراء وبيبقى وضع كف الأيدي على الأرض ومشط الرجل بس اللى ملامس للأرض، وبتبدأ تنزل بجسمك وهو مفرود لتحت وتطلع تانى.
ال crunches:
تمرين ال crunches بيشتغل على عضلات البطن كلها.
بتنام على ضهرك، وبتضم رجلك عليك مع ارتكاز بطن الرجل على الأرض، وايدك بتكون وراء الرأس وبتبدأ تطلع برأسك والجزء العلوي من ضهرك لفوق وتنزل تانى تلمس الأرض.
ال Mountain climbers:
من التمارين اللى بتشغل معظم عضلات الجسم زى الرجل والبطن والكتف.
بتضبط جسمك فى وضع الضغط العادى وتبدأ تحرك رجلك اكنك هتجرى فى المكان فى وضع الضغط.
ال Running:
الجرى بيشغل عضلات الجسم كله وبيساعد على رفع مستوى اللياقة البدنية وتقوية عضلات القلب.
ال climbing stairs:
ده ببساطة انك تطلع سلم البيت بتاعكم، التمرين ده بيشغل عضلات الرجل وبيعلى من اللياقة البدنية.
ال Stretching exercises:
دى مجموعة تمارين هدفها أنها تكسب جسمك مرونة وتحميه من الإصابات لما تتعرض لأحمال قوية سواء أثناء تمرينك أو أثناء طلوعك الجبل والفيديو ده فيه تمارين لل Stretching مناسبة ليكم.
ومتنساش تكمل سلسلة سنة أولى هايكنج.
أقرأ ايضاً:
