هل سبق وان فكرت في حياة بدون سوشيال ميديا ؟ .. امتى آخر مرة بعدت عن اشعارات السوشيال ميديا، وقفلت موبايلك وقررت تقضي حياة بدون سوشيال ميديا، وقت مع نفسك وبس؟!
بما إنك من سكان المدينة فأكيد بتتعرض لضغط يومي سواء من الشغل او البيئة الملوثة او التواصل المستمر مع اللي حواليك او حتى بسبب إنك تقريبا بتعيد نفس اليوم كل يوم!!
فوائد التخييم لجسمك
أغلبنا عنده مشاكل صحية سواء كان عنده وعي بيها او لا، زي نقص فيتامينات معينة او سوء هضم او مشاكل في المناعة
وده بدوره بيأثر علي عمرنا وحياتنا على المدى الطويل وحالتنا النفسية على المدى القصير؛ رحلات التخييم هي التجربة اللي بتاخدك من زحمة الحياة لهدوء الطبيعة.
هواء الطبيعة النقي مش بس بينقي رئتيك وجهازك التنفسي ده كمان بيزود هرمون الدوبامين الي بيتحكم في حالتك المزاجية
لفحة الهواء الي بتلمس وشك وتنفسك العميق بيملى روحك بالسكينة والهدوء.
شمس التخييم مش زي شمس المدينة لأنك هتاخد فيتامين د منها بأعلى جودة
واللي بدوره هيسمح لجسمك أنه يستفيد من الكالسيوم والفسفور الي بيساعدنا ف تقوية الأسنان والعظم وبيمنع السرطان وبيحسن المناعة كمان.
فوائد التخييم لنفسيتك
أمراضنا النفسية هي أمراض مدينة في المقام الأول، والضغط المستمر والروتين المتكرر قادرين يغيروا شخصيتك 180 درجة وبتبقى أشبه بالقنبلة الموقوتة اللي ممكن تنفجر في أي لحظة
ده غير إنك ممكن تتعرض للإصابة بأي مرض نفسي في أي لحظة؛ لأن حتى مناعتك النفسية بتبقى ضعيفة، وهنا بييجي دور التخييم عشان يفصلك عن كل زحمة حياتك ودوشة أفكارك ويخليك تفصل عن كل مثيرات حياتك وتاخد هُدنة.
كل الناس اللي خاضت تجربة التخييم حسوا بالفرق الشاسع بين نفسيتهم قبل وبعد الرحلة، ده غير النظريات النفسية اللي بتشوف إن كل ضغوطاتنا النفسية سببها حياة المدينة والضوضاء والايقاع السريع للحياة اللي بيخليك معندكش رفاهية إنك تاخد فرصة للاسترخاء والتأمل.
وعشان كده التخييم بيكون هو المخرج من كل الضغوطات دي والراحة والسكينة النفسية والجسدية.. الهدوء، اختلاطك بناس جديدة، دخولك تجارب مختلفة واكتسابك لمهارات نادرة ومتميزة بيكونوا جزء لا يتجزأ من أسباب سعادتك بعد رحلة التخييم.
أقرأ ايضاً:
