تعالي نتعرف مع بعض ازاي بنختار المنامة المناسبة؟ وازاي نعرف نفرق بين المنامة الصيفي والشتوي؟ .. وكمان ايه هي أشكال المنامة؟ وازاي تقارن المنامات ببعض؟!
من أدوات التخييم المتوقف عليها استمتاعك بالرحلة بشكل رئيسي هي المنامة، وعشان كده لازم تقدر تختار المنامة المناسبة ليك…
عناصر اختيار المنامة المناسبة للرحلة
فيه 3 عناصر اساسية ومهمة علي اساسها بنختار المنامة للرحلة وهي كالاتي:
1) تصنيف درجة حرارة المنامة
لازم تختار منامة درجة حرارتها أقل من حالة الجو اللي انت هتستخدمها فيه، يعني لو حالة الطقس ٧ هات المنامة درجة حرارتها 1 مثلاً مفيش عدد درجات محدد بنقلله لأنه بيعتمد على كفاءة المنامة بتاعتك.
2) نوع العزل
العزل بيكون نوعين:
- أول نوع “Down” وده بيكون عبارة عن ريش أو الوز ووزنه خفيف وسهل يتضغط ومناسب أكتر لو الجو برد وفيها نظام اسمه Fill power والسعر غالي.
- تاني نوع “Synthetic” بيكون عبارة عن حشو صناعي أو ألياف صناعية لكن مش مسببة للحساسية، سريع الجفاف وبيعزل حتى لو غير جاف حسب معالجة الحشو وكفائته
3) الوزن
المادة المستخدمة في العزل هي المحددة لأنها بتفرق في وزن المنامة.
طريقة معرفة الفرق بين المنامة الصيفي والشتوي؟
التصنيف العام حدد إن أي منامة درجة حرارتها أعلى من 30 درجة تبقى صيفي.
وأي منامة درجة حرارتها أقل من 15 درجة تبقى منامة شتوي.
وبنفكرك تاني انك لازم تجيب درجة حرارة المنامة أقل من درجة حرارة الجو حواليك.
أشكال المنامة؟
في البداية عايزة اوضحلك ان المنامة وظيفتها انها تحتفظ بدرجة الحرارة الخارجة من جسمك، وبالتالي كل ما كانت مساحتها أقل كل ما حافظت على درجة الحرارة أكتر.
متاح 3 أشكال للمنامة:
- شكل المومياء: وده أصغر شكل وبيكون بحجم الجسم بالظبط وبالتالي وزنه أقل وكفائته في احتفاظه بدرجة الحرارة أعلى.
- شكل المومياء المعدل: ودا بيكون أوسع شوية من شكل المومياء لأن فيه ناس بيزعجها ان المنامة تكون بحجم الجسم بالظبط.
- الشكل المستطيل: أكبر شكل متوفر في المنامات.
ازاي تقارن ٢ منامة ببعض؟!
بعد ما عرفت العناصر اللي بناء عليها بتختار المنامة الأنسب ليك وعرفت كل عنصر ووظيفته، لازم المنامتين يكونوا نفس تصنيف درجة الحرارة علشان نقارن صح.
ولو سألنا عن أفضل منامة بناء على العناصر اللي شرحناها..
هتكون المنامة اللي درجة حرارتها أقل من درجة حرارة الجو، و الحشو بتاعها نوعه Down ويكون وزنها خفيف وعلى شكل المومياء.
أقرأ ايضاً:
