التخييم يعني نار في مكان ساحر وهادي سواء على قمة جبل أو في الصحراء، مشهد جميل للنجوم في السماء، يعني ريحة الشوي، يعني أجواء جميلة ومختلفة. وأياً كان هدفك من التخييم فأكيد هتحتاج انك تخطط صح وتجهز أدوات التخييم للحفاظ على متعتك في رحلة التخييم.
أدوات التخييم الأساسية
أدوات تخييم أساسية لمتعة أكبر في رحلة التخييم تعالى نشوف قائمة الادوات الخاصة بالتخييم وهي كالاتي:
شنطة ظهر للرحلات
من أهم أدوات التخييم، وهنا بننصحك انك تجيب شنطة Tactical او Backpack ويكون فيها جيوب كتير وهوكات تعلق عليها حاجتك عشان متستهلكش من مساحة الشنطة.
ملابس ترحال
- طبعاً بتختلف حسب الفصل الي انت مسافر فيه، لو كنت مسافر في الصيف هتلاقي هنا مقال مفصل عن ملابس الترحال،
- المهم بكون لبسك مريح وخفيف وطبعاً يبقى معاك كاب او اي حاجة تحمي راسك م الشمس.
- ومتجيبش كوتشي تجربه في الرحلة، خد معاك كوتشي مناسب للتربة ومريح لرجلك ولو أول مرة ليك ألبس شرابين عشان رحلك متحتكش بالكوتش بطريقة مباشرة.
الخيمة
- وبتختارها بناءً على عدد الأفراد الي هيبقوا جواها وهاتها ضد المطر لو مسافر في الشتاء.
المنامة
- وبتكون على حسب درجة حرارة الجو اللي انت هتخيم فيه
- وهتلاقي منها أنواع وأشكال مختلفة وتقدر تتعرف على ازاي تختار أنسب منامة ليك من موقعنا.
المياه
- يفضل تاخد معاك قربة مياه من 2:3 لتر حسب الوقت اللي هتقضيه في رحلة التخييم
أدوات الطبخ
- سكينة، معلقة، فتاحة إلخ
- كلهم في أداه واحدة Tools Multi، و هتلاقي أطقم طبخ مكونة من حلل صغيرة مخصصة لرحلات التخييم.
- هتحتاج كمان موقد غاز وولاعة أو كبريت، طبق وكوباية بلاستيك وبراد او علبة معدن للشاي والقهوة أو اي أعشاب.
أدوات تخييم فرعية
كشاف، أكياس بلاستيك للزبالة، مناديل مبللة، كحول، صابون، كريم واقي من الشمس، نضارة، شال.
وبعد توضيح الأساسيات اللي انت هتحتاجها معاك في رحلة التخييم، في أدوات تانية ضرورية بس ممكن متحتجهاش غير في حالات محددة:
- صفارة
- بوصلة
- قلم وورقة
- عصا مشب
- حبل
- كوريك حفر
- بلطة تقطيع الخشب
- باور بانك
- موبايل فيه خريطة و GPS
- حقيبة الإسعافات الأولية واللي وجودها ضروري جدآ في الرحلات الجبلية وبتبقى مقسمة لأدوات وأدوية.
وأخيراً، بننصحك بالإطلاع باستمرار على القواعد واللوائح وقيود التخييم قبل الإنتهاء من أدوات التخييم الخاصة بيك. ورحلة سعيدة!
أقرأ ايضاً:
